Хуралай һунгамалнууд шатаршан Номина Дармаевае амаршалба
Сибириин ба Алас-Дурна зүгэй хэдэ дахин шатараар чемпионка Номина Дармаевае Арадай Хуралай һунгамалнууд амаршалһан байна. Классическа шатараар Номина Азиин түрүү һуури эзэлхын мүрысөөндэ 3-дахи һуури эзэлжэ ерээ.
Буряад Уласай Арадай Хуралай Түрүүлэгшэ Владимир Павлов амаршалгын үгэ хэлэхэдээ, шатарай талаар Номина ехэ амжалта туйлажа, түрэһэн нютагаа дахинаа сурхуулаа гээд тэмдэглээ.
«Залуу шатаршан Номина Дармаевада баяр баясхаланаа мэдүүлнэбди. Саашадаа дэлхэйн чемпион болохыень хүсэе», -гээд Владимир Павлов хэлээ.
Шатар хүгжөөлгэдэ горитой хубитаяа оруулжа ябаһан Номина Дармаевада Буряад Уласай Арадай Хуралай баярай бэшэг барюулагдаһан байна.
«Энэ мүрысөөн намда ехэ хүндэ байгаа. Ташкент хотодо үнгэрһэн турнир 2 үдэр соо болоо. Шатарай мүрысөөнэй үедэ ехэ һанаагаа зобооб», -гээд Номина һанамжаараа хубаалдаа.
Арадай Хуралай һунгамал Инна Ивахиновагай тэмдэглэһээр, Номина Дармаева ехэ оролдоно, олон юумэндэ түргөөр һурана. Тэрэнэй урда ехэ амжалтанууд хүлеэнэ.
Буряад Уласай Арадай Хуралай Можонууд хоорондын харилсаанай, үндэһэ яһатанай асуудалнуудай, залуушуулай бодолгын, олониитын ба шажанай нэгэдэлнүүдэй талаар хорооной түрүүлэгшэ Виталий Лыгденов мүн лэ шатаршаниие амаршалхадаа, тэрэнэй илалта, амжалтануудые тэмдэглэһэн байна.